研究臺語 ê 人，kàu 某一个坎站會開始沐著「主謂結構」，「主謂結構」是指名詞詞素後壁鬥一个動詞或--者是形容詞詞素，成做主語 kap 謂語 ê 關係，是「某乜物件按怎--矣」ê 構詞型態。
因為咱 ê 話「主謂結構」ê 構詞，有寡詞主語 ê 尾字會讀做本調，ex. 地#動、天#光、風#吹……，煞致使有人認為「主謂構詞」主語 ê 尾字一定愛讀本調，論真，咱 ê 話「主謂構詞」主語尾字有 ê 是讀本調，有 ê 是讀變調，有 ê 是兩可（ex.心酸、頭疼、地動、日出、喙饞），有 ê 有腔口差，有 ê 是歧音異義（ex. 風吹、喙焦、心悶），並毋是「主謂構詞」主語 ê 尾字一定愛讀本調。
以下舉兩字詞 kap 三字詞來討論，四字詞因為閣 khah 複雜，暫且不論，主語尾字有讀本調 ê 例如下（尾字定著讀本調，所致就無閣加「#」字號）：地#動、天#光、風#吹、心#酸、心#軟、心#疼、心#悶、心#寒、火#大、手#賤、皮#癢、屎#緊、喙#破、頭#疼、頭殼#疼、嚨喉#疼、腹肚#枵、心花#開、按呢#生、胃#下垂、胃#潰瘍、胃#慒慒、腦#震盪、肝#硬化……。
有朋友講主謂構詞主語尾字無讀本調 ê 例，欲揣 10 个以上應該有困難？以下是主語無讀本調 ê 例：【面熟 bīn-si̍k】、【米芳 bí-phang】、【喙白 tshuì-pe̍h】、【年老 nî-lāu】、【膽寒 tám-hân】、【目花 ba̍k-hue】、【情願 tsîng-guān】、【米絞 bí-ká】、【花箍 hue-khoo】、【肉拊 bah-hú】、【肉酥 bah-soo】、【頭到 thâu-kàu】、【跤擋 kha-tòng】、【手擋 tshiú-tòng】、【樹栽 tshiū-tsai】、【刺鑿 tshì-tsha̍k】、【序大 sī-tuā】、【心適 sim-sik】、【山崩 san-phing】、【腦充血 náu-tshiong-hiat】、【耳空輕 hīnn/hī-khang-khin】、【燒酒醉 sio-tsiú-tsuì】......（族繁不及備載）。
a.【地動】只个主謂構詞，論真，中部 ê 海口誠濟前字有變調，閩南 ê 漳泉廈也有 tsit 號情形。
b.【天光】，部份偏泉腔頭--字慣勢讀高降調。
c.【喙焦】，主詞讀本調 ê 時是『口乾舌燥火氣大』ê 意思，主詞讀變調 ê 時是『口喝』ê 意思。
d.【心悶】，主詞讀本調 ê 時是動詞，ex.你是咧心悶阿媽--諾？主詞讀變調 ê 時是名詞，ex.啉酒解心悶。
e.【頭疼 thâu-thiànn】，《臺日》前字標變調，生活中也真捷聽--著。當然，生活中也有人是讀做【頭#疼】（ex.《臺灣閩南語語法稿》p.172）。
f.【喙饞 tshuì-sâi】，《臺日》前字標本調，現 tsú 時生活中聽--著--ê 是讀變調。