臺語ê變調問題誠複雜，有ê人會用「詞(word)」抑是「詞組(phrase)」來決定敢是愛變調，論真，讀本調、變調kap「詞」抑是「詞組」無必然ê關係，可比講「紅花」若是指一種漢藥，按呢是一个「詞」，若是指「紅色ê花」，按呢是「詞組」，兩種【紅花】ê 頭--字攏讀變調，羅馬字分別標做「âng-hue」kap「âng hue」。（可比講英語ê「blackboard」是「詞」，「black board」是「詞組」）。
咱ê話拄著四音節ê時淡薄仔費氣，以「兩字修飾語」鬥「兩字中心語」ê偏正結構（指後壁ê中心語受頭前ê修飾語來修飾）來講，愛先分做「偏正複合名詞」kap「名詞性偏正詞組」。
一、四音節ê偏正複合名詞：臺灣大學、鹿港國中、北港大橋、彰化客運、南部地區、順成藥房、烏人齒膏、烏松沙士......。
「原則上」次字讀變調大概是多數專家ê共識，照咱ê話在來一般日常口頭語ê讀法，四音節ê偏正複合名詞頭前ê修飾語會變調，也就是臺語界定提來做例ê「臺灣大學」只个情形。逐家來想看咱細漢所讀ê有淡薄仔歷史ê國小、中學頭前許兩字，次字咱有變調--無？ex.「中山國小」、「鹿港國中」、「臺中一中」、「高雄中學」、「彰化女中」……，所致照咱在來ê讀法是愛變調。tsit-má因為有寡新學校，可比講臺北市政府邊--頭新ê學校「博愛國小」（1992年創校），因為新ê學校名khah生疏，致使臺語若khah無遐保守ê人就khah會讀做「博愛#國小#」，毋拄若是像基隆ê「仁愛國小」，歷史悠久，在地人次字就是讀變調。會共次字讀做本調--ê，論真是kap「生熟」有干過，khah無適合講是為著欲維持專有名詞單位ê主體性來共次字讀做本調。
只ê「名詞性偏正詞組」閣khah費氣，「名詞性偏正詞組」ê意思就是「？？？？」=「？？ê？？」，因為會用得講做「？？ê？？」，所致有ê人若感覺「流行文化」是一个khah新ê新詞，伊就愈有可能會共伊讀做「流行#文化#」=「流行# ê 文化#」，毋拄若感覺已經是熟詞，按呢就khah會共次字讀做變調。生疏ê新詞寢開始次字若讀本調，tse會用得講是為著欲予聽ê人聽khah會清楚，khah好理解，一旦唸久變做熟語，照咱ê話在來ê傳統，母語人士ê老大人就自然khah會共次字讀做變調。
閣有一个例是臺語老歌、電影ê「悲情城市」，「悲情城市」若毋是特別指許塊臺語歌曲抑是許齣電影，按呢是「名詞性偏正詞組」，若是有所特指，按呢是「偏正複合名詞」。臺語老歌「悲情城市」，究真本底ê歌名是號做「悲情的城市」，路尾誠濟老大人省略中央ê「的」（抑是落勾--去），講做「悲情#城市#」，也是後起ê「新詞」；「悲情城市」只齣電影ê名稱當然也是新詞，而且斯當時號名ê時，並無一定是徛佇臺語ê理路來號名，照講是行華語ê路草。因此，「悲情城市」只个新詞，次字讀做本調也誠合理，久--來只个專名tsia̋n tiâu--咧。面書頂有一位黃--先講：「我頭兩遍會講「悲情#城市#」，最後一遍會講「悲情城市#」，因為已經講過兩遍，第三遍若閣講「悲情#城市#」，感覺真『做作』！」，黃--先ê語感反映出「生熟」ê因素。
除了頂頭所舉ê例：「烏人#齒膏#」、「烏松#沙士#」、「順生#藥房#」、「順成#藥房#」、「悲情#城市#」（雖然也會用得算是熟語--矣！毋拄次字iu原讀本調）以外，閣有非日常生活口頭語嘛愛掠外，可比講唸歌ê表演、漢文詩詞、公開場合ê放送……等。
所致佇日常生活口頭語來講，四音節ê偏正複合名詞，次字「原則上」在來ê傳統會讀變調，四音節ê名詞性偏正詞組，次字雖然khah有可能讀做本調，毋拄一旦若感覺是熟詞，也是會讀做變調。總講--一句，上重要ê因素並毋是佇結構抑是詞性，論真是「生詞、熟詞」ê因端，抑是特別欲強調ê語境（ex.廣告詞、表演藝術、漢文詩詞、對公眾ê言談……）。
有時，現代人ê日常生活口頭語，拄著四字詞偏正結構ê「熟詞」，咱也是定定聽見現代人會共次字讀做本調，尤其是臺語相對khah無hiah保守ê人多數會按呢讀。若是平素咧化仙、開講，tse是無要緊，毋拄若是去比賽、考試，拄著只種四字詞偏正結構ê「熟詞」，就會建議讀變調khah好勢，毋拄頂頭有舉一寡例愛掠外，種个例外ê情形當然iá有其他ê例。
[1] 2015/12/26潘科元「臺語變調ê類型kap影響變調ê因素」，國立臺中教育大學臺灣語文學系專題演講。