【慣勢】兩字是白讀，有腔口差「kuàn/kuàinn/kuìnn-sì」，傳統用法干焦用佇動詞、副詞，無用佇名詞，動詞 ê 用法可比講【我搬來臺北已經十外年囉，嘛沓沓慣勢囉！】副詞 ê 用法可比講【我一般攏較慣勢開車去學校，坐車愛閣盤幾 lō 遍車，傷費氣囉！】。
若是名詞，傳統講法是文讀詞彙【習慣 si̍p-kuàn】，ex. 【好習慣】、【歹習慣】、【我 ê 習慣是......】，無腔口差，一律讀做「si̍p-kuàn」，【習慣】路尾也沓沓仔有人用來做動詞，《教典》已經收錄。
所致【慣】字對漳腔來說，文白讀 sâng 音，計讀做「kuàn」，對泉腔來說有文白異讀，文讀「kuàn」，白讀「kuàinn（同廈音）、kuìnn（新泉音）、kirìnn（老泉音）」。
目今，臺語界袂少人誤共【慣勢】當做名詞，建議照傳統用法。