【瀑布 pho̍k-pòo】佇 1923 年 ê《增補廈英》就有記載--囉！佇 1932 年 ê《臺日大辭典．下冊》也有收錄，下底註一字「文」--字，所致，【瀑布】是在來臺語 ê 文讀詞，毋是戰後 tsiah 去予國語穢--著--ê。
張屏生教授 ê《臺灣地區漢語方言的語音和詞彙》有 19 个方言點，除了金門、崙背、大牛椆無資料以外，講做【瀑布】--ê 有鹿港、梧棲、湖西、臺北、小琉球、綠島、臺南、草屯，講做【水沖 tsuí-tshiâng】--ê 有湖西、宜蘭、草屯、高雄、屏東、加瓠朗，講做【山水 suann-tsuí】--ê 有臺西，講做【水雙叉 tsuí-siang-tshe】--ê 有三峽，講做【水帕 tsuí-phuè】--ê 有吉貝，其中，湖西、草屯是【瀑布】、【水沖】計有記錄。
另外，新北市烏來(u-lai) ê 臺語人，共「waterfall」號做【懸水 kuân-tsuí】（感謝臺大地理系黃偉嘉先生報我知）。屏東滿州的「佳樂（洛）水」，原名「高落水」，應該也是著讀做【懸落水 kuân-lo̍h-tsuí】。
阮老 pě 是規世人 99.9 % 說臺語 ê 臺灣人，伊就是說【瀑布】，毋捌聽過【水沖】。當然，tse 有可能是因為阮鹿港無天然 ê「waterfall」，所致伊學只个詞ê時，是行文讀詞 ê 路草。
總--是，若主張講「waterfall」ê 臺語干焦會用得說做「水沖」，袂用得說「瀑布」！An-ni就 kap 事實無對同--囉！