「敢」--字有文白異讀，文讀「kám」，白讀「kiám」、「kánn」、「kán」，詞性、意義計有分化。
一、文讀 ê【敢 kám】、白讀 ê【敢 kiám】做疑問詞，有兩个意思：
(一)做中性疑問副詞，用佇是非、正反提問問句，後壁無接否定式，ex. 這看著真好食款，你敢欲食？
(二)「反詰」問句，只種「反問句」ê 語調一般會提懸或--者是加強 hit 句話 ê 語氣，意思是華語 ê『難道、豈』，甚至有【明知故(koh)問】ê 氣口，後壁會用得接否定式，《廈英》ê 解說真清楚：「an initial interrogative particle which asks a question meant to be answered in the negative, thus equal to a strong affirmation of the opposite.」ex.(a)這已經臭酸--矣！你敢欲閣食？(b)這看著真好食款，你敢無愛食？
二、文讀 ê【敢 kám】、白讀 ê【敢 kiám】後壁接「彩」--字做副詞，也就是【敢彩 kám/kiám-tshái】（教育部寫做「檢采」），意思是「perhaps」，只个詞彙猶有真濟音變，ex.「khiám/tiám/thiám-tshái)」。客話說【敢怕 kám-phà】。
三、白讀 ê「kánn」用佇第一人稱省略 ê『臆測動詞』，是「I suppose……、I think……、I presume……」ê 意思，ex.「敢是」、「敢無」、「敢有影--喔」、「敢著去」、「敢欲落雨--矣」……，意思倚近一般 ê 副詞【敢若 kánn/kán/ká-ná】，阮鹿港讀做「kàn-ná......」，前字是陰去。
四、白讀 ê【敢 kán】，是同安腔 ê 疑問詞，《廈英大辭典》認定伊 ê 漢字是「敢」，《臺日大辭典》漢字也是寫做「敢」，在來 ê 歌仔冊寫做借音字「簡」，意思是英語 ê「how can…...」，普通腔講做【哪會 ná-ē】（本底是「nà-ē」），ex.【敢會 kán-ē/uē】：「how can that be!」。只个同安腔 ê「kán」，漳腔講做「thái/thài」，教育部漢字寫做「呔」，也說做【呔討 thái-thó】，ex.「呔有」、「呔會......」、「呔毋來」，或--者是【怎 tsuánn)會】；廈門腔講做【怎 tsáinn】、【侢 tsāi】，ex.【怎(tsáinn)樣】（同安話、金門話讀做「tsàinn-iūnn」）、【怎(tsáinn)會......】、【侢會......】；泉州話說做【障 tsiùnn】、【障仔 tsiùnn-á】、【侢 tsǎi】，ex.「障仔會......」、「侢會......」。