有收「tsháinn/tshái-tshuah」ê 辭典誠少，除了AABB形式ê「tsháinn/tshái-tsháinn/tshái-tshuah-tshuah」、「mái-mái-tshuah-tshuah」以外，也有ABB形式ê「tsháinn/tshái-tshuah-tshuah」（有人講做「bán-tshuah-tshuah」）。倒手爿是1931年ê《臺日大辭典．上冊》，正手爿懸頂是2000年盧廣誠ê《實用台語詞典》，正手爿下底是1923年《增補廈英大辭典》。
《臺日》ê解說是『1.心懷不滿或心有不平時，粗魯地、粗暴地強取。2.粗暴、冷淡的動作。3.粗暴、粗魯的行為。』《盧典》ê解說就是陳雅菁亻因大家官所講ê「一个人袂爽、咧張」。《增補廈英》ê解說是『小孩子不想被餵食，從人身上脫身。』只个詞是一个多義詞，論真包括頂頭所有ê義項，淡薄仔複雜。
頭--字若是《臺日》所寫ê【筅】，就愛有「tshíng/tsháinn/tshuínn-tshuah」ê方音差，毋拄漳州無人讀做「tshíng-tshuah」，泉州嘛無人讀做「tshuínn-tshuah」，所致頭--字毋是【筅】。《盧典》共「tsháinn」當做【搶】ê白讀，總--是，【搶】--字中古屬「宕開三」、「梗開二」，拍算無白讀[-ainn]、[-ai] ê音讀，而且會kap另外一个詞【搶掣 tshiúnn-tshuah】產生混淆，晉江俗語：【作穡搶掣步，拍人偷食步。】，【搶掣】ê意思是「干焦亄(it)著眼前ê利益，做工課、做生理並毋是實實在在（會偷工減料），袂去考慮著愛久久長長。」武漢肺炎期間，阿陸仔一寡咧做喙罨--ê，就會用講是咧【使(sái)搶掣步】，所致也有人是說【使掣 sái-tshuah】。
「tsháinn/tshái-tshuah」ê漢字可能會用得寫做「採掣」。
《臺日》ê解說是『1.心懷不滿或心有不平時，粗魯地、粗暴地強取。2.粗暴、冷淡的動作。3.粗暴、粗魯的行為。』《盧典》ê解說就是陳雅菁亻因大家官所講ê「一个人袂爽、咧張」。《增補廈英》ê解說是『小孩子不想被餵食，從人身上脫身。』只个詞是一个多義詞，論真包括頂頭所有ê義項，淡薄仔複雜。
頭--字若是《臺日》所寫ê【筅】，就愛有「tshíng/tsháinn/tshuínn-tshuah」ê方音差，毋拄漳州無人讀做「tshíng-tshuah」，泉州嘛無人讀做「tshuínn-tshuah」，所致頭--字毋是【筅】。《盧典》共「tsháinn」當做【搶】ê白讀，總--是，【搶】--字中古屬「宕開三」、「梗開二」，拍算無白讀[-ainn]、[-ai] ê音讀，而且會kap另外一个詞【搶掣 tshiúnn-tshuah】產生混淆，晉江俗語：【作穡搶掣步，拍人偷食步。】，【搶掣】ê意思是「干焦亄(it)著眼前ê利益，做工課、做生理並毋是實實在在（會偷工減料），袂去考慮著愛久久長長。」武漢肺炎期間，阿陸仔一寡咧做喙罨--ê，就會用講是咧【使(sái)搶掣步】，所致也有人是說【使掣 sái-tshuah】。
「tsháinn/tshái-tshuah」ê漢字可能會用得寫做「採掣」。
《臺日》、《盧典》是記頭--字有鼻化ê「tsháinn-tshuah」，《增補廈英》ê頭--字是記無鼻化ê「tshái-tshuah」，漳南也是說「tshái-tshuah」。