食【濁(to̍k/lô)水溪】水 ê「濁水溪米」，頂港有名聲、下港有出名，真濟【米絞 bí-ká】計是記錄咱彰化濁水溪米 ê 歷史，是重要 ê 文化資產。
興時(hìng-sî)，稻仔割--落來了後，愛用【機器桶 ke-khì-tháng】脫穀（日本時代以前是用【摔桶 sak/siak-tháng】），【粟仔 tshik-á】用麻布袋入做一袋一袋，踮門口埕、大路邊用【耙柫 pê-put/kut】曝粟仔，曝焦 ê 粟仔 tsiah 閣倒入去「風鼓」鼓粟仔。
粟仔送去農會（組合）【糶粟 thiò-tshik】，踮農會抑是米跤【挨米 ue/e/ere-bí】，古早咧挨米 ê 時，愛做三改，第一遍共【粗糠 tshoo-khng】（殼）拍挕捒，留--落來--个就是【糙米 tshò-bí】，日本人號做「玄米(げんまい)」，粗糠會做得飼雞鴨、做起厝 ê【塗墼 thôo-kat】，抑是提去燃柴(hiânn-tshâ)；第二遍拍挕捒--ê 是【糠仔 khng-á】，最後一遍是拍【米糠 bí-khng】挕捒，誠濟計是提去飼豬。古早人無咧食糙米，計是食白米較濟，現 tsú 時煞講糙米顛倒並白米閣 khah 有營養。
我佇枋橋 ê 米店講欲【糴 tia̍h】一斗米，頭家娘煞笑--出來，伊講臺北無咧算「斗」，計是算「斤」--ê，伊嘛毋知一斗是幾斤，有一過，我問阮學校一个 tih 欲退休 ê 工友（木柵人、37 年次），伊講亻因從細漢就攏算「斤」無算「斗」--囉！邊--頭一个同事是宜蘭人，伊講宜蘭人糴米嘛是干焦算「斤」無算「斗」，誠心適。
話講翻頭，「糶粟、糴米」佇臺北 tsha̋u 強欲變做「死語(dead language)」--囉！量其約來算，一斗 tsha̋u 是十一斤半（有人講是十一斤十）、較臨(lím)七 khí-lòo/looh(キロ)。