昨--日佇新竹講習 ê 時，有老師問講：「敢干焦會用得講【米粉炒】，袂用得講【炒米粉】？因為有臺語專家講臺語干焦會用得講【米粉炒】。」
論真，1931 年 ê《臺日大辭典．上冊》就有收【炒米粉】--矣（如附圖）！有人可能會想講《臺日》所收--ê 是「動詞詞組」，毋是【米粉炒】所欲表達 ê「名詞」，按呢咱繼續來看伊 ê 釋義，
【炒米粉】：「【米粉 bí-hún】に肉．葱等を混ぜて炒った料理。」（上冊 p.576）
【米粉炒】：「【米粉 bí-hún】を油で炒った料理。」（下冊 p.646）
窮實，《臺日》所收 ê【炒米粉】嘛是指「名詞」，毋是指「動詞詞組」；也就是講共 tsit 項料理講做【炒米粉】，上無，佇日本時代 ê《臺日》就已經有記載--矣！所致咱 ê 話並毋是干焦會用得講做【米粉炒】。
聽講，「米粉」蓋有名 ê 新竹，濟歲人就是干焦講【炒米粉】，無咧講【米粉炒】。
