只一年來，有一位真興(hìng)臺語第六聲个ôo-lí-sáng，一直佇一寡臺語个面書社團咧傳播伊「kāi-kī个」第六聲，有淡薄仔聲韻觀念个人一看隨知，伊所說个第六聲，窮實是伊臺灣普通腔第七聲个變調（事實是老泉腔則有第六聲），誤將變調當做第六聲个本調；近來咱解說一寡例予伊看，伊看着咱寫有个學者嘛共喉塞第八聲个變調記做「22」，伊煞當做是「發現新大陸」，繼續對伊「kāi-kī个」第六聲深信不已。
為着咱即位發現新大陸个老先生个言論，大概所有對聲韻有了解个諸多先進，攏捌佇面書真熱心來共伊解說(kué-serh)，毋拄伊孤一人力戰群雄，用伊一知半解个聲韻觀念，繼續主裁每一个版面；對初入臺語聲韻个朋友，往往會造成一般人个混淆kap誤解。
uì 舊年熱--人開始，咱為着即件事志(tāi-tsì)，也用袂少喙水來向伊老歲仔人解說。總--是，好心予雷唚，昨日(tsā/tsa̍h-ji̍t)咱請伊......標出「是#毋是#，是廟寺#」个調值，「#」是本調.......來方便討論」，結局伊看無即个基本个聲韻記號，咱煞顛倒着落伊个家教，去予老先生講「出題出了有問題......出題者該注意！」
古早人講「一言不中，千言無用」，確實有影，咱有个先進早就看--破，無愛閣插(tshap)--伊，我實在是傷家婆，拄着種个(tsióng-ge)無討論基礎个人，「死龜諍到成(tsiânn)活鱉」，咱閣戇戇想卜共伊開破，人所說(--lâng--sóo--serh)：「和尚諍尼姑，木耳諍香菇；送嫁諍媒人，澎鼓諍錢筒」，我早就應該學建坊先攑白旗！
https://www.facebook.com/groups/Taigisia/permalink/434167333333483/
https://www.facebook.com/groups/Taigisia/permalink/496114587132403/
https://www.facebook.com/groups/Taigisia/permalink/631359390274588/