彰化縣 ê 福興鄉、埔鹽鄉有「同安寮十二庄」，人所說：「十二庄請媽祖，也有獅、也有虎」、「十二庄請媽祖，百百旗（奇）」，亻因逐年 ê 「請媽祖」攏真鬧熱，舊年嘛已經去予文化局列做彰化縣 ê 無形文化資產。因為同安寮佇鹿港 ê 南爿，所致嘛有人共伊號做「廈十二庄」，現代人有 ê 共伊拂(hut)毋著--去，煞敆敆(kap-kap)做伙濫糝(lām-sám)講做「同安寮廈十二庄」，論真，老勻 ê 在地人並無按呢說。
只个地頭徛算 uan-ná 是我碩士論文田野調查 ê 一部份基地，地號名會號做「同安寮」，當然是因為在地人 ê 祖籍多數來自泉州府 ê 同安縣。在我 ê 觀察，老勻--ê 是講做白讀音 ê「tâng11 uann33 liâu24」，中年勻--ê 是講文讀音个「tông11 an33 liâu24」，少年勻--ê 含(hiâm) 陽平 ê 變調嘛讀做中平調，煞變成「tông33 an33 liâu24」，種个(tsióng-ge)語音 ê 轉換，也體現地號名白讀向文讀、泉腔向普通腔移動 ê 痕跡。
阮三姑婆就是嫁佇十二庄 ê 大公館菜園角，結果阮塊 ê sī 大人，也有略仔說走音--去，變做「tâng-hua-liâu」，kap 惠安人共「惠安」說做「hūn-huann」ê 音變有差不多 ê 音韻理路。
ps.(1)兩句十二庄 ê 俗語，感謝論文寫作期間莊研育先生報予我知。
(2)相片來源：許嘉勇，2007，《許我一間厝，許我一塊埔－鹿港許厝埔十二庄》，彰化縣文化局，頁43，2003年翕。