〈「啥物」次字 ê 音讀〉，《歌仔冊年刊》創刊號，2021.06，p.77-78。
許嘉勇
咱 ê 話有寡出現佇句尾 ê 詞，照講是無應當出現佇句尾 ê 句法成分(sîng-hun)，種个(tsióng-ge)文句表示說話 ê 人有寡話並無講--出來，毋拄聽話 ê 人已經會用得理解，所致無需要閣繼續解說。只 tsua̋i 標示有話並無講明 ê 成分，會用得號做「言談標誌(discourse marker)」（盧廣誠，《臺灣閩南語概要》p.111-112）。可比講：我聽一下笑「甲（仔）」、人熱「甲（仔）」、人𤺪(siān) 「甲（仔）」、衰「甲（仔）」[1]、我都食飽--矣「閣」、我都無錢--矣「閣」、人都死--矣「閣」、人都走去美國--矣「閣」、柳丁足甜--ê「講」、「姦(kàn)」。只 tsua̋i 句尾 ê「言談標誌」實際計讀做變調。
「省乜」是咱 ê 話 ê「基本詞彙」，照講，無 sâng 腔口 sâng 款是有共同 ê 底棧(underlying form)，頭--字有「siánn、siám（受次字聲母逆向同化）、sánn、sím、sénn（銅山 西埔說【省人 sénn-lâng】）、há」各種變體，次字有 ê 記做陰入 ê「mih」，有ê記做陽入 ê「mi̍h」，閣有「meh」ê變體，漢字照講著寫做「省乜」，在來 ê 歌仔簿（冊）寫做「省乜」也誠四常。
「省乜」ê 次字就是頂一段所說 ê 句尾 ê「言談標誌」，佇「省乜」後壁已經斷句 ê「乜」--字，有 ê 所在 iu 原講做陰入本調，ex. 三邑泉腔（陰入本調讀高促調[50]或者是喉陰入有略仔降 ê [540]），基隆盧廣誠老師、漳南銅山島 ê 五都腔（陰入本調讀中降促調[320]）……。
毋拄現代多數 ê 腔口，「省乜」後壁已經斷句 ê「乜」--字，實際是讀做高降調 ê「siánn-mi53」，照我 ê 淺見，應當是就是頂頭所講 ê 省略後壁話句 ê「言談標誌」，因為【乜 mih】ê 變調是「-h4變2」，所致實際是高降調 ê [53]，只个省略後壁話句 ê「言談標誌」佇頂懸咱看--著 ê 例，計是讀做變調，因此只个高降調 ê「mi53」就是喉束陰入(-h4) ê 變調[2]，閣拄千符合同安腔陽入 ê 本調（目前臺語下半州腔 ê 主流），致使在來 ê 白話字定定記做「siánn-mi̍h」。只个省略後壁話句 ê「言談標誌」，因為多數 ê 腔口喉束音/-h/變調了後會脫落，造成現代人會感覺是次字陰上 ê「siánn-mí」。
「省乜」ê 後壁無斷句 ê 時，次字【乜 mih】ê 後壁接名詞，只个時陣【乜 mih】正常變調，普通腔是「-h4 變 2」，實際調值讀做次字次高平調 ê「siánn-mi44 + N.」，一般人會記做次字陰上 ê「siánn-mí + N.」，論真是虛詞輕讀再變調 ê 因端。咱 ê 話陰去、喉束陰入 ê 虛詞，定定因為語義虛化，致使 kap 後壁 ê 音節佮(kap) khah 倚，以普通腔所講 ê「3 變 2」、「-h4 變 2」來講，閣進一步產生第二次變調「2 變 1」，也就是「3 變 2 變 1」、「-h4 變 2 變 1」，實際語音定定弱化變做高短調，ex.【去 khì/khù/khìr】、【佮 kah/kap】、【甲 kah】、【較 khah】、【欲 beh/bueh/berh/boh】、【咧 teh/leh/tih/lerh/terh】、【閣 koh】、【才 tsiah/tsiànn】、【遮 tsiah/tsuah】、【遐 hiah/huah】、【煞 suah】、【毋過(koh/kò)】、【會用得(eh)】、【袂用得(eh)】。表面形式(surface form)看--起來是「siánn-mí44 + N.」，究真次字 ê 底棧 iu 原是喉束陰入 ê【乜 mih】。
另外，以筆者 ê 鹿港話來講，鹿港確實也有人是說做「siánn-mí55」、「siánn-mí35 + N.」，毋拄照我 ê 淺見來看，tse 是路尾 ê 變體，鹿港 iu 原有老大人是說「siánn-mih50/540」、「siánn-mih50/540/55/554 + N.」，只个次字讀做陰上本調 ê「siánn-mí55」，照講就是原型「siánn-mih50」次字喉束脫落了後 ê 變體，進一步演變 kàu 後壁接名詞ê時，「what + N.」也變做次字讀中升調 ê「siánn-mí35 + N.」。
閣有幾个相關詞彙：【乜代（事） mih-tāi】、【何乜苦 hôo/hô-mih-khóo】、【某乜人 bóo-mih-lâng】，「what」ê「乜」也計是喉束陰入 ê「mih」，《教典》共「某乜人」、「何乜苦」 ê次字孤記做路尾 ê 變體「mí」，顛倒無記本底正讀 ê 喉束陰入「mih」，日本時代 ê《臺日大辭典》就是記做「bóo-mih-lâng」、「bóo-mih-hiann(兄)」、「hô-mih-khóo」。
音變、音變，十音九變，尤其是常用詞閣 khah kuē/khuài 變。「省乜」次字 ê 表面形式(surface form)雖然各樣，因為無 sâng ê 因端有無 sâng ê 表現行為，毋拄咱若究勘伊 ê 底棧(underlyling form)，伊 ê 本調窮實就是喉束陰入 ê【乜 mih】。
------------------------------------------------------------------------------------------------------------------------------------------------
[1] 2023.03.11補，《閩南語漳腔辭典》：「直接做補語，相當於北京話的“…得很”，“…極了”，後面不再帶成分，“甲”讀如陰入帶p、t、k塞音尾的變調後的調值，但聲音可以拖長」（陳正統，2007：211），「甲」ê 句法位置是「副詞」，無適合解說做「補語」。
[2] 頂一段三邑泉腔 ê「mih50/540」也會用得看做是變調，因為本調、變調 ê 調值 sann-sâng。