若是在來咱ê話，「活動」是孤讀做白讀ê「ua̍h-tāng/tǎng」，意思是「active; lively; constantly moving; said of body or mind.」也就是《教典》ê釋義，頭前三个義項ê意思，是做形容詞、動詞，無做名詞ê用法。
1923年佇臺灣出版ê《增補廈英》，「活動寫真」、「活動影像」ê「活動」也計是記做白讀ê「oa̍h-tāng」，符合在來「活動」兩字ê音讀，「活動寫真」、「活動影像」是偏正詞組，頭前ê「活動」也符合在來形容詞ê用法。
kàu 1926年三--月ê《臺灣府城教會報》，頭一遍開始出現「oa̍h-tōng siá-chin」。後--來，1931年ê《臺日大辭典．上冊》共「活動寫真」ê次字記做「tōng/tāng」文白兩音，所致大約佇日本時代中期，開始出現一白一文ê【活動 ua̍h-tōng】。1926-1965年ê教會報資料庫，有32期記錄著「oa̍h-tōng」，咱掠khah早期1929年ê三條語料來分析：「Nā-sī lâng ê lûn-lí-tek ê oa̍h-tōng, ......」、「Hit ê oa̍h-tōng chiū-sī lô͘-lē kái-hòng, ......」、「......goá bat koan-khuàⁿ Ki-tok-kàu ê oa̍h-tōng.」，【活動 ua̍h-tōng】動詞名詞化ê用法已經出現。
「活動」兩字計讀做文讀音ê「hua̍t-tōng/tǒng」，愛kàu 1932年ê《臺日大辭典．下冊》tsiah有出現，後壁有加註一字「國」--字，可見伊是借自日本話「活動(かつどう)」ê臺語外來詞。1932-1963年ê《臺灣府城教會報》也有記錄九條「hoa̍t-tōng」ê語料，其中六條是做動詞，賰ê三條權算是動詞名詞化ê用法（1954年「......siông-sè kiám-cha lán sim-lāi ê hoa̍t-tōng, ......」，1955年「Bo̍k-chhoan Bo̍k-su ū káng Jī-pún chheng-liân hoa̍t-tōng ê chōng-hóng.」、「......khì khuàⁿ Ji̍t-pún chheng-liân tī kàu-hoē ê hua̍t-tōng kap kang-chok.」）。
由此咱會用得了解「活動」音讀ê演變，在來是孤讀做白讀ê「ua̍h-tāng」（做形容詞、動詞），日本時代中期開始有文白摻濫ê「ua̍h-tōng」，兩字計讀做文讀ê「hua̍t-tōng」原底是借自日本話ê新詞，現代罕得聽見有人猶閣共頭--字呼做文讀ê「hua̍t」，基本上計是讀做白讀ê「ua̍h」，次字ê「動」有人呼文讀音、有人呼白讀音。
咱ê話khah保守ê濟歲人，有ê有【勾破 khau/kau-phuà】ê用法，形容詞、動詞講「ua̍h-tāng」，「名詞」講「ua̍h-tōng」。