【數街路石 siàu ke/kue/kere-lōo-tsio̍h】
只(tsí)句話 ê 本義雖然是「counting the stones on the streets」，毋拄伊原底 ê 引申義窮實是「walking about at leisure」，阮鹿港 kàu 今(tann) iá 有說「食飽，數街路石」；只句話閣用來指「無頭路通(thang)做 ê 人」，究真是再引申義。
「數」--字讀做「sòo」是伊 ê 文讀音，讀做「siàu」是「數」ê 白讀音，現代人多數 khah 知影【數 siàu】名詞 kap 副詞 ê 用法，名詞：【算數 sǹg/suìnn-siàu】、【數簿 siàu-phōo】、【數櫃 siàu-kuī】......，副詞：【數念 siàu-liām】、【數想 siàu-siūnn/siōnn/siǔnn】......。
【數 siàu】閣有另外一个動詞 ê 用法，是『計數』(to count)，毋是『計算』(to calculate)，ex.「tsit 袋柑仔 15 粒，你數(siàu)看覓--咧！」（只句話是往過承(sîn)阮 a̋u ê 話鬚所記--ê），「只三萬箍你數(siàu)看覓--咧」，「錢#數--來（『錢數過來』）」。俗語：【數佛做粿 siàu-pu̍t-tsò/tsuè/tserè-kué/ké/kér】（蕭下阿國說【數佛粿龜 siàu pu̍t-kér-ku】）、【數枝拍佛 siàu-ki-phah-hu̍t】、【一日食飽數桁(楹)仔桷仔 tsi̍t ji̍t tsia̍h pá siàu ênn/înn-á kak-á】、【秤斤數粒】（和美張淑貞）、【食飽等咧數桁(楹)仔桷仔】、【數跤念步隨隨來】（尾兩句記自晉江阿郎）ê【數 siàu】也是只个語用，現代人多數已經失落【數 siàu】做動詞 ê 用法，計說做【算 sǹg/suìnn】，所致有 ê 人是共「數枝拍佛」說做【算(sǹg/suìnn)枝拍佛】。論真，【算 sǹg/suìnn】tsiah 是『計算』(to calculate)。
ps.影片 lāi/lǎi 底【店舖 tiàm-phòo】ê 次字，讀做現代人多數讀賺(tānn) ê 「phōo」，正讀是陰去，毋是陽去。
https://www.facebook.com/Taiwan.1930s/videos/806129232878821/